فى سخونة أحداث عام 1972م والانتفاضة ومظاهرات الطلبة والمعتقل . .
والأحداث التى عاشتها مصر سطر أحمد فؤاد نجم هذه القصيدة
بلدى وحبيبتى
الغرام فى الدم سارح
والهوى طارح معزة
والحنين للقلب بارح ، والنوى جارح يا عزة
يا ابتسامة فجر هلت بددت ليلى الحزين
يا ندى الصبح اللى شقشق فوق خدودى الدبلانين
بل شوقهم
صحى لون الورد فيهم
مين يدوقهم؟
مين سواكى ؟ يا حياتى يا ملاكى
يا نسيم الحب لما هب هز القلب هزة
يا هوى الأحلام يا عزة
الليلة دى جم خدونى يا ملاكى
جوز تنابلة ونص دستة من التيران
كنت باحلم يا حبيبتى
كنت باحلم بيكى انت
كنا قال انا وانت قال
فى جنينة خضرا . . ومحاوطها البرتقان والسيسبان
وانت جوا قرنفلاية
فى العبير بتستحمى
اجرى يمك يا هوايا ، تسبقينى وتجرى يمى
والغصون واقفة وشايفة بتراعينا
بس خايفة من العيون
والعيون بتقول كلام
والكلام طاير حمام
بينادينا بالأغانى
ويهادينا بالسلام
كنت باحلم يا حبيبتى ، كنت باحلم بيكى انت
أيوه انت
ومين سواكى ؟؟
يا حياتى يا ملاكى
يا نسيم الحب لما هب هز القلب هزة
يا هوى الأحلام يا عزة
وانطلق فى الجو فجأة
يا حبيبتى صوت مفاجأة
صوت يخلى الدم يجمد
اصحى يا احمد . . . اصحى يا احمد
وانتهى الحلم الجميل
وابتدا الهم التقيل
فين إمام؟؟؟؟!
إنتو مين ؟
إحنا ناس متكلفين
تيجى سالك مش هاتتعب
واحنا طبعا معذورين
انتو دود الأرض والآفة المخيفة
انتو ذرة رمل فى عنين الخليفة
انتو كرباج المظالم والمآسى
انتو علة فى جسم بلدى . . انتو جيفة!!
سكتوه ابن الكلاب . . سففوه من التراب
فتشوا كل الأماكن
طلعوا رفوف الدولاب
كممونى يا حبيبتى !!
كتفونى يا حبيبتى !!
قومونى .. قعدونى
كل شعرة فى جسمى بالعين فتشوها
والمخدة من جنانهم شرحوها
وانتهى التفتيش . . مافيش
صدقينى ما تخافيش
هوه فيه يا عزة عندى ممنوعات
غير باحب الناس وباكره السكات
بص واحد م التنابلة جوه عينى
وانت عارفة عينيا صافية وطيبيين
زى كل عيون بلدنا
شباكين ع القلب دوغرى موصلين
كان مناه يلمح علامة خوف بسيطة
طب هيجى الخوف منين يا ابن العبيطة !!
هو مين فين الجبان ؟
والا مين فينا اللى خان ؟؟
اللى قلبه بالمحبة وبالأمانى
وبالربيع الاخضر مزهر والأغانى
والا كلب الصيد وأسياده الأباطرة
أكالين لحم البشر فوق الصوانى
هو بص فى عينى بصة
ارتجف وف حلقه غصة
واتعوج ومال وقال
كلمتين مش مفهومين
أصله شاف صورتين جمال
فى العيون الطيبيين
مصر فى العين الشمال
وانت فى العين اليمين
أحمد فؤاد نجم
بلدى وحبيبتى 
www.alestidafa.com 
رد: بلدى وحبيبتى 
العرض العادي
